ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ

ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ


ಬಾಲ ಎತ್ತಿ ತಲೆಯ ಒತ್ತಿ ಮಸ್ತಿಹಿಡಿದ ರೀತಿಯಲಿ
ಬಾಲ ಹಿಡಿಯಬಂದ ಜನರ ಕಣ್ಣ ದೂಳ ತುಂಬುತಲಿ
ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ

ಹಿಂದೆಮುಂದೆ ತಿರುಗುತಲಿ ಅತ್ತ ಇತ್ತ ನೋಡುತಲಿ
ಎಲ್ಲಿ ಏನು ಉಳಿಸೆನೆಂಬ ಮದವು ತುಂಬಿ ಮನದಲ್ಲಿ 
ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ

ಮುಂದೆ ಮೂಗುದಾರವಿಲ್ಲ ಕುತ್ತಿಗೆಯಲ್ಲಿ ಹಗ್ಗವಿಲ್ಲ
ಹಿಡಿಯ ಬಂದ ಜನರ ತಾನು ತಲೆಯಬೀಸಿ ನೂಕುತಲಿ
ಗೂಳಿಯೊಂದು ಓಡಿತಿದೆ ಪಿಂಗಾಣಿಯ ಜಾತ್ರೆಯಲಿ

ತನ್ನತನ ಅದಕಿಲ್ಲ ಇನ್ನು ಬೇರೆ ಭಾವ ಲೆಕ್ಕಕಿಲ್ಲ  
ಹಮ್ಮು ತುಂಬಿ ಮನದಲ್ಲಿ ಪರಚಿಂತೆ ಅದಕಿಲ್ಲ  
ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ

ಎಲ್ಲಿ ಏನು ಗೊಂದಲದಲಿ ಜನರ ಕೂಗಾಟದಲಿ
ಗೂಳಿಯನ್ನು ಮನದಿ ಶಪಿಸೆ ತಾನು ಮಾತ್ರ ಹರುಷದಲಿ
ಗೂಳಿಯೊಂದು ಓಡುತಿದೆ ಪಿಂಗಾಣಿಯ ಜಾತ್ರೆಯಲಿ

[published in SAMPADA in 14 mar 2011]