ಕವನ ಎಂಬ ನಾಚಿಕೆಯ ಬಾಲಕಿ

ಕವನ ಎಂಬ ನಾಚಿಕೆಯ ಬಾಲಕಿ
---------------

ಕವನ ಎಂಬ ನಾಚಿಕೆಯ ಬಾಲಕಿ ಆಕೆ
ಮಾತನಾಡಳು  ಬಲು ಸಂಕೋಚದವಳಾಕೆ
ಕರೆದರೆ ಬಳಿ ಬಾರಳು
ಬಂದರು ಎದುರಿಗೆ ತಲೆ ಎತ್ತಿ ನಿಲ್ಲಳು

ನಸು ಬೆಳಗಿನ ಜಾವ
ಹೊರಗಡೆ ಕತ್ತಲೆ ಕತ್ತಲೆ
ಚುಮು ಚುಮು ಚಳಿಗೆ ಬೆಚ್ಚಗೆ ಹೊದ್ದು ಮಲಗಿದ್ದೆ
ಹೊರಗೆ ಜಿಟಿ ಜಿಟಿ ಮಳೆ

ಮಳೆಯ ಹನಿಯ ಹನಿಯ ಸತತ ಶಬ್ದ
ಹೊರಗೆ ಮನೆಯ ಆವರಣದಲ್ಲಿ ಗೆಜ್ಜೆಯ ಶಬ್ದ!
ಬೆಚ್ಚಿ ಎದ್ದು ಕುಳಿತೆ!
ಅದ್ಯಾರು ಈ ಸಮಯದಲ್ಲಿ

ಬಾಗಿಲು ತೆರೆದು ಹೊರಬಂದರೆ
ಕವನ ಎಂಬ ನಾಚಿಕೆಯ ಬಾಲಕಿ ಆಕೆ
ಮಾತನಾಡಳು  ಬಲು ಸಂಕೋಚದವಳಾಕೆ
ಕರೆದರೆ ಬಳಿ ಬಾರಳು
ಬಂದರು ಎದುರಿಗೆ ತಲೆ ಎತ್ತಿ ನಿಲ್ಲಳು

ನನ್ನನ್ನು ಕಾಣುತ್ತಲೆ
ನಿಧಾನ ಹೆಜ್ಜೆ ಇಡುತ್ತ ಮಳೆಯಲ್ಲಿ ಮರೆಯಾದಳು
ಕತ್ತಲಲ್ಲಿ ಮಳೆ ಹನಿಗಳ ನಡುವಿನಲ್ಲಿ
ಕತ್ತಲಲ್ಲಿ ಬೆಳಕು ಕರಗಿದಂತೆ
ಕವನ ಎಂಬ ನಾಚಿಕೆಯ ಬಾಲಕಿ
ಕತ್ತಲಲ್ಲಿ ಕರಗಿ ಕಣ್ಮರೆಯಾದಳು